BANDUNG BANDAWASA
Tugas Kelas VIII
Kacarita Prabu Damarmaya dalah ingkang garwa Dewi
Candrawati, ratu wicaksana berbudi bawaleksana. Para kawulane tansah sumuyud,
sumanggem lan sumadya samubarang karya.
Nuju ing dina pasewakan pepak nayakaning praja, ketekan tamu
kang tanpa kanyana. Kaget Sang Prabu mulat tamune, ing batin ngunandika: Sapa
baya tamu iki. Nitik sandhang panggone dudu kawula lumrah, nanging polatane
nuduhke wewatekane kang kasar ngongasake kasudibyane.
“ He, Kisanak, sapa baya aranmu, saka ngendi, lan ngemu
karep apa dene teka ing paseban,” mangkono ngendikane Sang Prabu bareng wis
satata lungguh.
“Jenengku Prabu Gupala saka negara Wanasegara. Tekaku ing
Pengging kene ngemu karep nedya ngudan – udan sore marang Dyah Ayu Dewi
Candrawati.”
Dheg! Dhadane Prabu Damarmaya rasane kaya kebledhosan bom
sewu, nganti sawetara ora kewetu ngendikane.
“Piye sang Prabu? Candrawati dadi garwaku. Dadi Prameswari
ing Wanasegara sugih bandha bandhu, dhasar ratune sekti ora tedhas pluru,”
sambunge Prabu Gupala ora sabar karo lakak – lakak.
“Hem...Prabu Gupala, ngertia yen Dewi Candrawati iku
garwaku, malah saiki wis nggarbini.”
“Ah! Kapan olehe dadi nganten aku ora nekseni lan ora
ngesahake. Mula senajan wis meteng, aku tetep gelem nampa wong ayu kuwi. Dene
yen ora entuk, arep dakgawe karang abang. Pengging sakbyuki bathang sayuta.”
Sang Prabu Damarmaya entek kesabarane menyat ngendika semu
duka.
“We, lha dudu karepe dhewe iki. Prabu Gupala pranyata murang
tata. Bebasan sadumuk bathuk senyari bumi takbelani tekaning pati. Prabu Gupala
aja ngatonake lanang dhewe. Entenana blabar kawat yen pancen nantang pati.”
Prabu Gupala metu, sumusul prajurit Wanasegara sing wis
siyaga ing njaban kraton. Sang Prabu Darmayanaparing prentah marang rekyana
patih supaya enggal siyaga gelar sepapan ngadhepi prajurit Wanasegara. Bubar
paring wangsit marang ingkang garwa banjur budhalan.
Kocap anggone padha peperangan durung ana tandha – tandha
sing kalah utawa menang. Dewi Candrawati kang ana kedhaton nglairake jabang
bayi kakung. Para emban ora ana sing kuat mbopong marga saka abot banget. Eling
wangsite kakunge, Dewi Candrawati nggendhong putrane kang nedya disusulke
ramane ing palagan. Tekane tinampa sang Prabu Damarmaya kanthi gembiraning
galih, kang banjur maringi asma “Bandung”.
“He Bandung, kowe mbesuk bakal dadi satriya pinujul,”
ngendikane karo mbopong putrane. Nanging sepira kagete, bareng Bandung ilang
musna saka astane. Prabu Damarmaya kekarone padha tangisan nggetuni. Wiwit kuwi
Prabu Damarmaya ngumumake marang para kawulane aja nganti nyawung bayi.
Prabu Gupala ngguyu lakak – lakak bisa ngrebut bayi saka
mungsuhe tanpa kaweruhan.
“Yen bayi iki mati, Damarmaya tansah nggetuni. Akhire
perange mesthi kalah. Yoh aja takon dosamu.”
Badung dicandhak sikile loro pisan, disabetake ing watu,
pres! Njur dibanting, breg!
“Modar kowe Bandung, sedhela engkas bapakmu nusul,”
pambengkone karo malang kadhak.
Sepira kagete Prabu Gupala weruh bayi tetep wutuh, malah
ngguyu kaya dililing.prabu Gupala ngambali maneh bayi dibanting marambah. Anehe
saben dibanting, awake Bandung saya mundhak gedhene.
Meruhi kahanan kaya ngono Prabu Gupala tansaya muntabnesune.
Sedyane bayi arep diuntal ben mati digawe jamu awakke. Saka rumangsane Prabu
Gupala, Bandung wis dadi jamu. Nanging wektu iku Bandung disaut utusane Dewa kang
banjur makayangan.
Ana ing kayangan malah kaparingan aji jaya kawijayan dening
para Dewa. Jenenge diimbuhi Bandawasa kadhawuhan mulih menyang Pengging ngadhep
wong tuwane.
“Bocah bagus, sapa sejatine sira iku, saka ngendi lan ana
karep apa?” Bandung Bandawasa kaget, ora ngira yen ramane kaya ngono. Mula semu
gragapan matur kanthi sumungkem.
“Kula Bandung Bandawasa, putranipun Kanjeng Rama Prabu
Damarmaya kaliyan Ibu Candrawati ing Pengging.”Prabu Damarmaya ndomblong karo
mirsani garwane. Eling nalika semana nate kagungan putra kang wis musna. Dene
saiki ana bocah enom ngaku putrane. Apa iya apa dudu dadi emeng penggalihe.
“Bandung Bandawasa, nalika semana aku nate duwe putra,
nanging musna saka astaku nalika dakbopong. Ewasemono aja sumelang. Lamun bisa nyirep
peperangan iki kanthi mikut Prabu Gupala ateges sira putraku. Nanging yen ora
bisa, sira sun pratapi paukuman pati.”
Bandung Bandawasa sumanggem banjur budhal kanth nyuwun
pangestu. Gancaring crita Bandung Bandawasa klakon adhep – adhepan lawan Prabu
Gupala.
“Heh, Bocah Bagus luwih becik muliha. Bapakmu ora bisa
ngalahke aja maneh kowe.”
“Nanging aku kecongah mateni kowe kang wis gawe rusake
Pengging.”
“o, Ho – babo. Iki wong dhugdeng samaladheng. Dibodhem
mendat ditumbak mlenthong. Apa maneh Badung, takremet dadi glepung.”
Durung meneng olehe kumecap tangane kiwa kumlawe njotos
pilingan. Sing jotos endha, trengginas tangan tengen nylonong pener irung karo
sikil ndugang. Bandung Bandawasa mundur sejangkah, tangane nothok polok.
Swarane kaya mbanting bathok. Prabu Gupala pringisan rumangsa disepelekake.
Prabu Gupala oleh kalodhangan, sikile tengen ndugang lempeng
sakayange. Kedadak sikil kiwa kepleset. Luput panendhange, Prabu Gupala tiba
krengkengan. Panggonan iku katelah Desa Watu Lunyu.
Prabu Gupala mundur, Bandung Bandawasa kejeglong in
jugangan. Kang banjur katelah desa Jeglong.
Prabu Gupala kena diruket, banjur keket padha bantingan.
Nanging Prabu Gupala kalah rosa, kena didengkek, nganti sambat ngaru ara,
nangis. Eluhe netes lemah banjur dadi kali, ara kali Dengkeng.
Tangane Prabu Gupala diunter nganti tugel, dibuwang ngalor
tekan Jepara. Mula wong Jepara baud ngukir.
Sirahe Prabu Gupala dibanting pecah, polone dibuwang ngidul
dadi gunung kapur.
Bandung Bandawasa sing bisa mateni Prabu Gupala bablas
menyang Kraton Wanasegara. Tujuwane arep ngrusak Kraton, nanging bareng weruh
wanodya atine gunjing. Kanepsone lerem malih dadi kesengsem marang kasulistyane
Gandrung – Gandrung kapiluyu, ora sida ngrusak nanging arep nggarwa marang
wanodya ayu.
“Ee, Nini Sulistya sapa jenengmu?” panyapane Bandung
Bandawasa semu kaku.
“Aku Rara Jonggrang adine Prabu Gupala sing ngganti
panguwasa sajrone Kakang Gupala ngayahi peperangan.”
“Ngertiya yen kakangmu wis mati ing Palagan. Mula kowe wae
tak boyong menyang pengging pinangka dadi garwaku.”
“Aja keladuk pangucap, aku iki dudu wanita murahan.”
Krungu wangsulan sengak, Bandung Bandawasa ora nesu, nanging
tetep ngrerepa murih gelema dadi garwane. Nadyan njaluk apa bakal dituruti.
“Bandung, aku gelem kokpek angger bisa mundhutake anting –
antingku sing kecemplung sumur.”
Entuk wangsulan kaya ngono, ora ngira marang paekaning liyan
Bandung nyaguhi tanpa nalar lan petung. Amung ngeboti katresnan Bandung
Bandawasa klakon nyemplung sumur nggoleki anting – anting kang sanyatane ora
ana. Malah sumure diurug saka dhuwur.
Bandung Bandawasa ngara yen dipaeka, age – age gawe
trowongan kanggo dalan metu, supaya ora
mati kurugan. Trowongan njedhul Parangtritis, guwa sing kangge metu diarani
Guwa Langse.
Bandung Bandawasa mara maneh menyang Wanasegara. Rara
Jonggrang kaget lan geter. Kanggo nutupi rasa getere nuduhake ulat manis lan
kewetu tembunge mancing.
“O, Kakang, pancen wis dadi pasthine aku dadi garwamu.
Nanging aja ketanggungan olehe dadi satriya pinujul. Aku nyuwun digawekake candhi
sewu cacahe sing digawe sajroning sewengi.”
Krungu tembung kang luwes lan manis sakala tuwuh maneh lan
wuwuh tresnane, mula disaguhi. Wiwit wangslupe srengenge, Bandung Bandawasa
semadi nyenyuwun marang Dewa supaya jin setan periprayangan padha rerewang.
Rame swarane wong gegawean nanging ora katon wujude sing gawe. Ngerti – ngerti
dadi ana wewujudan candhi.
Rara Jonggrang atine goreh, rumangsa kejodheran anggone laku
goroh. Kang mangka penjaluke iku sejatining srana nolak alus. Tuwuh panemune
Rara Jonggang kanggo njugarake pakaryan, Rara Jonggrang mrentahake para nonoman
wadon padha nyapu latar senajan isih durung parak esuk. Sedhela wae wis rame
swarane wong nyapu kesusul jago kluruk sesautan amarga kegurahan. Badhar
semadine Bandung, mangka candhi lagi dadi 999. Mula bareng Rara Jonggrang
nambong kewetu sabdane.
“Rara Jonggrang, ayumu kepara angel tandhingane. Nanging,
bebudenmu ora becik. Kanggo nuruti penjalukmu genepe candhi sewu, sing siji
kowe dhewe!”
Kena sabdane Bandung Bandawasa sanalika Roro Jonggrang malih
dadi reca aran Candhi Rara Jonggrang.
Tidak ada komentar:
Posting Komentar